Նոր աշխատանք սկսելու մարտահրավերները

Բլոգ նրանց համար, ովքեր նոր են անցել աշխատանքի կամ նոր թիմում են սկսելու ծավալել գործունեություն․
Շատերը հեշտ են հարմարվում նոր միջավայրին՝ ելնելով իրենց մարդամոտ տեսակից, շատերն էլ՝ հաղթահարում են մեծ ու դժվար փորձություններ ու երբեմն նրանց անհրաժեշտ է լինում որևէ մեկի աջակցությունը։
Ցանկացած դեպքում՝ նոր աշխատանքի անցնելիս խնդիրներ, փորձություն կամ դժվարություններ ունենալն, ըստ էության, նորմալ երևույթ է, այլ հարց է, թե մեզնից յուրաքանչյուրը ինչպես է ընկալում իրավիճակն ու առաջացած հարցերը։
Այսօր խոսելու ենք այն հիմնական խնդիրներից, որոնք առաջանում են այն ժամանակ, երբ մենք սկսում ենք աշխատել նոր թիմում, և դրանց լուծումներից։

– Հարմարվել թիմին

Խնդիր․
Երբ փորձում ենք հասկանալ, թե ինչպես դառնալ աշխատանքային նոր մշակույթի մաս, երբեմն դա հիասթափեցնող է լինում: Չեն համընկնում աշխատանքային ոճն ու հարցերի հանդեպ մոտեցումները։ Թիմակիցների հետ փոխհարաբերությունները ինչ-որ պահի հասնում են պատնեշի կամ նույնիսկ չեն շարժվում տեղից։
Խնդիր կարող է առաջացնել անգամ ընդմիջում անելը՝ Դուք սովոր եք պատրաստել տանն ու ուտել դա, իսկ թիմն, օրինակ, սիրում է արագ սնունդ պատվիրել։

Լուծում․
Ծանոթացեք Ձեր գործընկերներին՝ աշխատելով թիմային նախագծերի վրա: Սա նպաստում է ընդհանուր շահերին, ձևավորում է վստահություն և դաշնակիցներ: Հարցեր տվեք, եթե ինչ-որ բան չեք հասկանում: Եղեք ընկերասեր և հարգալից: Ձեր լավ վերաբերմունքը, բարքերը և աշխատանքային սովորությունները ցույց կտան, որ Դուք պրոֆեսիոնալ եք։
Գործընկերների վստահությունը ձեռք բերելու համար ժամանակ է պահանջվում՝ Ձեր գաղափարներին համապատասխանեցնելու համար՝ նախ լսեք և հետևեք, այնուհետև սկսեք փոփոխություններ առաջարկելը՝ հիմնվելով իրենց սովորությունների վրա:

Թիմակիցների կողմից լուծում․Երբ թիմին նոր մարդ է միանում, հիշեք, որ նա ունի 90 օր իր սահմանագծին հասնելու համար։
Հետազոտությունները (մանրամասները՝ ստորև) ցույց են տալիս, որ աշխատողների 30%-ը դուրս է գալիս աշխատանքից առաջին 3 ամիսների ընթացքում, ինչը կազմում է նոր աշխատանքի ընդունման փորձաշրջանի կարևոր տևողությունը: Սա նշանակում է, որ նոր մեկնարկողները ունեն 90 օր՝ հասնելու անկման կետին։ Սակայն այս փուլում ընկերությանն անհրաժեշտ է աշխատողի աջակցությունը այնքան, որքան աշխատողին՝ ընկերության աջակցությունը:
Որպես թիմակիցներ՝ դրսևորեք ուշադրություն, հոգատարություն և համբերություն նոր աշխատակցի նկատմամբ՝ նրա հետ լավ ու արդյունավետ հարաբերություններ ստեղծելու համար։

– Ճիշտ հասկանալ ու բաշխել ստացված տեղեկատվությունը

Խնդիր․
Նոր աշխատանք սկսելու ամենադժվար կողմերից մեկն այն է, որ Դուք պետք է արագ հասնեք Ձեր թիմի մնացած անդամներին, հատկապես, եթե ինչ-որ մեկին փոխարինում եք: Թեև լավ մենեջերները հասկանում և ակնկալում են, որ անհրաժեշտ է ունենալ ուսուցման շրջան, սակայն բիզնեսը չի կարող շատ երկար կանգ առնել, այնպես որ անհրաժեշտ է հստակեցնել տեղեկատվությունը սովորելու և դրանք աշխատանքում կիրառելու կոնկրետ ժամանակահատված: Հետևաբար, նոր աշխատակիցները հաճախ կանգնում են մեծ չափերով տեղեկությունների առջև ու հայտնվում անելանելի իրավիճակում։

Լուծում․
Աշխատանքի առաջին օրերին մանրակրկիտ խոսեք այն թիմակցի հետ, ով Ձեզ է փոխանցում աշխատանքը։ Խնդրեք նրան տրամադրել Ձեզ ամբողջական փաստաթուղթ, որտեղ նշված կլինեն Ձեր բոլոր գործառույթներն ու դրանք իրականացնելու մեթոդները։ Անպայման գրառումներ կատարեք Ձեզ մոտ այն մասին, թե որ աշխատանքը կատարելիս ինչ գործիքներ են Ձեզ անհրաժեշտ, ո՞ր թիմակցի հետ պետք է աշխատեք տվյալ առաջադրանքն անելիս։ Անպայման խոսեք ողջ թիմի հետ ու ներկայացրեք նրանց, որ Ձեզ անհրաժեշտ է 2 շաբաթ ժամանակ ողջ տեղեկատվությունը հասկանալու, վերլուծելու ու իրականացնելու համար։ Խնդրեք նրանց, որ Ձեզ այդ պահին չտրամադրեն հավելյալ ինֆորմացիա, քանի որ դա անարդյունավետ է լինելու։

Թիմակիցների կողմից լուծում․
Երբ թիմին միանում է նոր աշխատակից, դա նույնքան բարդ է գործող թիմի համար։ Մի կողմ թողնելով անձնական հարաբերությունները՝ թիմը դժվար է հարմարվում նոր մարդու ռիթմին, քանի որ նա, չտիրապետելով ողջ ինֆորմացիային և կատարողական գործընթացներին, աշխատում է ավելի դանդաղ, քան նախկին թիմակիցը (անգամ եթե նա արագաշարժ է ու ամեն ինչ անում է շատ արագ)։
Նման իրավիճակում անհրաժեշտ է օգնել թիմակիցներին ինֆորմացիան ճիշտ մարդուց ստանալու, այն ճիշտ ընկալելու և բաշխելու, ստացված ինֆորամցիայից անհրաժեշտ նշումներ կատարելու հարցերում։ Յուրաքանչյուրն իր հերթին պետք է գիտակցի, որ նոր թիմակիցը չի կարող ամեն բան անել միանգամից։ Հավաքագրեք ու սկսեք քիչ-քիչ փոխանցել իրեն անհրաժեշտ տեղեկատվությունը։

– Աշխատանքի ծանրաբեռնվածության բաժանում

Խնդիր․
Անկախ նրանից, Դուք պրակտիկանտ եք, թե լրիվ դրույքով աշխատակից, սկզբնական շրջանում ունենալու եք չափից դուրս ծանրաբեռնված և լրիվ ազատ օրեր: Սա կարող է առաջացնել մի իրավիճակ, երբ Դուք սկսեք սխալ ընկալել աշխատանքն ու դրա համար անհրաժեշտ ժամանակահատվածը։

Լուծում․
Յուրաքանչյուր իրավիճակ կարող է օգտագործվել Ձեր օգտին: Եթե դուք շատ քիչ աշխատանք ունեք, կարող եք ճանաչել աշխատակիցներին, հարցեր տալ և խնդրել ինչ-որ մեկին ինչ-որ բան սովորեցնել Ձեզ ազատ ժամանակ: Կգա մի պահ, երբ Դուք շատ աշխատանք կունենաք անելու ու ստիպված կլինեք արագ շատ նոր բաներ սովորել։ Այդ ժամանակ գործի կդնեք ազատ ժամանակ սովորած ինֆորմացիան և կսկսեք հարմարավետորեն շփվել այլ աշխատակիցների հետ և անել հասանելիք աշխատանքն արագ ու որակյալ:

Թիմակիցների կողմից լուծում․
Երբ կնկատեք, որ նոր թիմակիցը ծանրաբեռնված է ու չի կարողանում կատարել աշխատանքի ճիշտ բաժանում, աջակցեք նրան առաջադրանքների և ժամանակի ճիշտ բաշխման և կառավարման հարցերում։ Բերեք օրինակներ նախկինում եղած իրավիճակների և դրանց լուծման մասին։ Խորհուրդներ տվեք՝ մոտենալով իրավիճակին գիտակցաբար և լսեք նոր թիմակցի կարծիքը բոլոր հարցերի վերաբերյալ։

Այս ու մի շարք այլ խնդիրներ սովորաբար առաջանում են աշխատանքի անցնելու առաջին 90 օրերի ընթացքում։ Այդ ընթացքում անհրաժեշտ է լավագույնս տրվել աշխատանքին ու չխնայել ոչինչ, սակայն պետք չէ անտեսել աշխատանք-անձնական կյանք բալանսը։ Բացի վերը նշված 3 հիմնական խնդիրներից ու դրանց լուծման եղանակներից, հետևեք այս մի քանի պարզ կանոններին, որոնք կօգնեն Ձեզ նոր աշխատանքի անցնելիս, անգամ եթե չունենաք խնդիրներ։

Հստակեցրեք ակնկալիքները: Ստեղծեք անելիքների և պարտականությունների ցուցակ Ձեր ղեկավարի հետ և սահմանեք դրանց հասնելու ժամանակացույց: Խնդրեք հետադարձ կապ՝ համոզվելու համար, որ ճիշտ ուղու վրա եք:
Գտեք աշխատանքային մոդել: Թիմի փորձառու անդամը կարող է նորեկներին տրամադրել պատկերացում՝ կապված գրասենյակի արձանագրության և կատարողականի ակնկալիքների հետ: Դիմեք Ձեր մենեջերին կամ ավելի փորձառու աշխատակցի՝ հաշվետվությունների հանձնման և հաղորդակցման հարցերի համար։
Հետևեք, լսեք և սովորեք: Յուրաքանչյուր կազմակերպություն ունի իր չգրված կանոնները։ Հետևեք, թե ինչպես է փորձառու աշխատկիցը մոտենում խնդիրներին և փորձեք ընդօրինակել նրա պահվածքը:
Դուրս եկեք սուրճի կամ ճաշի: Ծանոթացեք Ձեր գործընկերներին ոչ պաշտոնական միջավայրերում՝ հարաբերություններ ստեղծելու համար:
Ճամփորդեք տարբեր շրջանակներով: Օգտագործեք մեթոդներ՝ այլ բաժինների աշխատակիցների հետ կապ հաստատելու համար: Դուք կսովորեք ընկերության մշակույթը, գործառնական պրակտիկաները և արժեքները:
Հարցեր տվեք. Բավականաչափ հարցեր չտալը հիմնական սխալն է, որը թույլ են տալիս նոր թիմակիցները աշխատանք սկսելիս: Երբ կասկածում եք որևէ հարցի շուրջ, պարզաբանում փնտրեք:
Հավասարակշռություն պահպանեք: Վստահություն դրսևորեք, բայց մի հայտնեք ամեն ինչի մասին: Ընդունեք բոլոր տեղեկությունները, նախքան որոշում կայացնելն ու առաջարկներ ներկայացնելը։