Python ծրագրավորում․ ուղեցույց սկսնակների համար

Python-ը ծրագրավորման ամենատարածված լեզուներից մեկն է այսօր՝ գրավելով բազմաթիվ անհատների ուշադրությունը, ովքեր ցանկանում են ծրագրավորող դառնալ: Բայց որտեղի՞ց սկսել Python ծրագրավորողի կարիերան: Այս ուղեցույցում մենք կօգնենք ձեզ՝ առաջարկելով քայլ առ քայլ մոտեցում, կառուցվածքային ուսումնական պլան և արժեքավոր ռեսուրսներ՝ ձեր ուսուցման գործընթացին աջակցելու համար:

Ի՞նչ է Python-ը

Python-ը, որը մշակվել է Գվիդո վան Ռոսումի կողմից և գործարկվել է 1991 թ. – ին, ծրագրավորման լեզու է, որը հայտնի է իր ընթեռնելիությամբ և պարզությամբ: Ի տարբերություն C++ – ի կամ Java-ի նման լեզուների՝ Python-ը ծրագրավորողներին թույլ է տալիս արտահայտել հասկացությունները՝  օգտագործելով ավելի քիչ կոդերի տողեր:

Python-ը մարմնավորում է օբյեկտի վրա հիմնված, ռեֆլեկտիվ, ֆունկցիոնալ, ընթացակարգային և կառուցվածքային ծրագրավորման պարադիգմներ: Այս բազմազան մոտեցումները ծրագրավորողներին թույլ են տալիս ստեղծել տրամաբանական և համահունչ կոդ, որը հարմար է տարբեր մասշտաբի նախագծերի համար:

Python-ի հիմնական առանձնահատկությունները

Տարիների ընթացքում Python-ը դարձել է ամենահայտնի ծրագրավորման լեզուներից մեկը՝ շնորհիվ իր պարզության, բազմակողմանիության և հավելվածների լայն շրջանակի:

Այս գործոնները նաև Python-ը դարձնում են տվյալների գիտության լավագույն ընտրությունը, քանի որ այն թույլ է տալիս Data Scientist-ներին կենտրոնանալ տվյալների ըմբռնման վրա՝ բարդ լեզվական խնդիրներով զբաղվելու փոխարեն:

Հիմա եկեք ավելի մանրամասն թվարկենք մի քանիսը:

• Անվճար և հասանելի – Python-ն անվճար է օգտագործելու համար և բաց կոդով է, այսինքն՝ յուրաքանչյուրը կարող է մուտք գործել և փոփոխել դրա կոդը:
• Ընթեռնելիություն – Python-ը հայտնի է իր պարզ և ընթեռնելի շարահյուսությամբ, որը որոշ չափով նման է անգլերենին: Ընթեռնելիության այս գործոնն օգնում է սկսնակներին՝ թույլ  տալով նրանց համեմատաբար հեշտությամբ հասկանալ, թե ինչ է անում կոդը:
• Հարուստ գործիքակազմ – Python-ն ունի բազմաթիվ գրադարաններ, որոնց կիրառումը կարող է խնայել ձեր ժամանակն ու ջանքերը՝  նվազագույնի հասցնելով զրոյից կոդավորման անհրաժեշտությունը: Բացի այդ՝ Python-ի ակտիվ համայնքը մշակել է հազարավոր երրորդ կողմի փաթեթներ և ավելի ընդլայնել Python-ի ֆունկցիոնալությունը: Այս ընդարձակ գրադարանը ներառում է մոդուլներ, ինչպիսիք են Django-ն, Flask-ը, NumPy-ը և SciPy-ը, ինչը հնարավորություն է տալիս ավելի արագ ավարտին հասցնել նախագծերը:
• Ճկուն ֆունկցիոնալ – Python-ի ճկունությունը թույլ է տալիս օգտվողներին ընդլայնել այն ՝ անհրաժեշտության դեպքում ավելացնելով նոր հնարավորություններ: Անկախ նրանից, թե դուք հետաքրքրված եք վեբ մշակմամբ, առաջադրանքների ավտոմատացումով, թե տվյալների գիտությամբ, Python-ն ունի գործիքներ, որոնք կօգնեն ձեզ հասնել նպատակին:
• Արդյունավետ վրիպազերծման (debugging) գործընթաց – Python-ի գծային կոդը հեշտացնում է վրիպազերծման գործընթացը՝ հնարավորություն տալով ծրագրավորողներին հեշտությամբ գտնել և ուղղել սխալները:

Lավագույն ոլորտները, որտեղ Python-ը կարող է դռներ բացել ձեզ համար

Ինչպես արդեն նշեցինք, իր ճկունության շնորհիվ Python-ը կարող է օգտագործվել տարբեր տիպի նախագծերում։ Հիմա կդիտարկենք այն ուղղությունները, որտեղ ծրագրավորողները հաճախ են ընտրում Python-ը։ 

Վեբ ծրագրավորում

Python-ի բազմակողմանիությունը այն դարձնում է վեբ ծրագրավորման հիմնական ընտրություններից մեկը: Django-ի և Flask-ի նման շրջանակներով կայքերի ստեղծումն ավելի մատչելի է դառնում: Որպես օրինակ՝ Python-ը վեբում կիրառում են այնպիսի ընկերություններ, ինչպիսիք են Instagram-ը, Reddit-ը, Uber-ը և Spotify-ը։

Ծրագրային ապահովումների մշակում 

Python-ի տիրապետումը թույլ է տալիս ստեղծել ծրագրեր և հավելվածներ տարբեր սարքերի համար: Այստեղ կարելի է օգտագործել NumPy-ի և Tkinter-ի նման գրադարանները՝ ծրագրավորման գործընթացները պարզեցնելու համար: Այս ուղղությամբ Python-ը կիրառող հայտնի ընկերություններից են Dropbox-ը, PyChess-ը, BitTorrent-ը և Gramps-ը:

Մեքենայական ուսուցում և արհեստական բանականություն

Python-ը մեքենայական ուսուցման և AI զարգացման առաջնագծում է: Կիրառեք գրադարանները, ինչպիսիք են TensorFlow, PyTorch և Scikit-learn-ը՝ որոնողական համակարգերի, սոցիալական մեդիայի,  ալգորիթմների հզորացման  և այլնի համար։

Տվյալագիտություն

Տվյալագիտության մեջ ևս Python-ը ծրագրավորման լեզվի հարցում հիմնական ընտրությունն է։ PyBrain-ը, Flask-ը և այլ գրադարաններ օգնում են տվյալների վիզուալիզացիային և վերլուծությանը։ Մյուս կողմից Web scraping (կայքից բովանդակություն և տվյալներ հանելու համար բոտերի օգտագործման գործընթացը) հմտությունները մեծ պահանջարկ ունեն բիզնես աշխարհում:

Խաղերի մշակում

Իրացրեք ձեր ստեղծագործական ունակությունները Python-ի միջոցով խաղեր մշակելով: PyGame-ի և Tkinter-ի նման գրադարաններով դուք կարող եք կյանքի կոչել ձեր խաղային գաղափարները: Python-ը կարելի է օգտագործել ինչպես պարզ խաղերի, այնպես էլ բարդ նախագծերի մշակման մեջ:

Ինչպես սովորել Python. քայլ առ քայլ ուղեցույց

1. Հասկացեք ձեր մոտիվացիան

Նախքան Python-ը սովորելը սկսելը, հասկացեք, թե ինչու եք ուզում սովորել այն: Հաշվի առեք  ձեր հետաքրքրությունները, ձեր կարիերայի նպատակները, խնդիրները, որոնք ցանկանում եք լուծել և ձեր հետաքրքրությունները:

2. Ընտրեք դասընթաց

Իհարկե, Python-ը կարելի է սովորել ինքնուրույն։ դրա համար կարող եք սկսել Python-ի հիմնարար հասկացություններից, ինչպիսիք են փոփոխականները, տվյալների տեսակները և օպերատորները: Բայց ավելի արագ և արդյունավետ կլինի մասնագիտական դասընթացի մասնակցելը։ Կարող եք դիտարկել BDG-ի Python Fundamentals դասընթացը։ 

3. Սովորեք գործնականում

Տեսական գիտելիքների ձեռքբերումը որպես առաջին փուլ շատ կարևոր է, բայց ծրագրավորում կարելի է սովորել միայն գործնական աշխատանքի միջոցով։ Կարող եք փորձել ինքնուրույն լուծել ձեզ հետաքրքրող խնդիրները, մասնակցել վեբինարների և գտնել ուսուցողական խնդիրներ: Կարող եք նաև մասնակցել BDG-ի Python Internship դասընթացին, որտեղ սովորելուց բացի մասնակիցները 3 ամիս գործնական պրակտիկա են անցնում և աշխատում են իրական պրոդուկտի մշակման վրա։ 

4. Շարունակեք մարտահրավեր նետել ինքներդ ձեզ

Անընդհատ փնտրեք նոր մարտահրավերներ՝ ընդլայնելու ձեր Python-ի իմացությունը: Ուսումնասիրեք այնպիսի մասնագիտացված ոլորտներ, ինչպիսիք են վեբ մշակման շրջանակները (օրինակ՝ Django, Flask), տվյալների գիտության գրադարանները (օրինակ՝ SciPy, scikit-learn) կամ մեքենայական ուսուցման ալգորիթմները:

Շարունակական ուսուցուման ռեսուրսներ Python սովորելու համար

Եկեք նաև անդրադառնանք Python-ը սովորելու մի քանի անվճար ռեսուրսների։ 

Python.org

Python-ի պաշտոնական կայքը՝ Python.org, անգնահատելի մեկնարկ է ծառայում սովորողների համար: Այն առաջարկում է հարուստ ռեսուրսներ, ներառյալ ձեռնարկներ և փաստաթղթեր, որոնք հարմար են բոլոր մակարդակների համար: Python.org-ի նյութերը հայտնի են իրենց պարզությամբ և ամբողջականությամբ, ինչը այն դարձնում է հիանալի ռեսուրս Python-ի շարահյուսությունը և լավագույն փորձը հասկանալու համար:

Codecademy

Codecademy-ն ապահովում է ինտերակտիվ հարթակ Python սովորելու համար գործնական վարժությունների միջոցով: Նրանց Python դասընթացը, որը հասանելի է նույնիսկ առանց բաժանորդագրության, սովորողներին քայլ առ քայլ առաջնորդում է հիմնարար հասկացությունների միջոցով՝ գործնական կոդավորման վարժություններով: 

Google’s Python Class

Google Python Class-ը ինքնուրույն առցանց դասընթաց է, որը նախատեսված է ծրագրավորման փորձ ունեցող մարդկանց համար: Այն ներկայացնում է դասախոսություններ և վարժություններ, որոնք ընդգրկում են Python-ի շարահյուսությունը, տվյալների կառուցվածքները և ալգորիթմները, ինչպես նաև Google հավելվածներում Python-ի օգտագործման իրական օրինակներ:

YouTube ալիքներ

YouTube-ում առկա են  Python-ի բազմաթիվ ձեռնարկներ, որոնք նախատեսված են տարբեր մակարդակների համար: Ալիքները, ինչպիսիք են «Corey Schafer»-ը, «Sentdex»-ը և «Tech With Tim»-ը, առաջարկում են բարձրորակ ձեռնարկներ, որոնք ներառում են Python-ի տարբեր կոնցեպտներ, վեբ զարգացման շրջանակներ և տվյալների գիտության թեմաներ:

Python Podcasts

Python-ի փոդքասթերը, ինչպիսիք են «Talk Python to Me»-ն և «Python Bytes»-ը, ներառում են հարցազրույցներ Python-ի փորձագետների հետ, որտեղ քննարկում են  վերջին նորությունները ոլորտում կամ  խորասուզվում Python-ի կոնկրետ թեմաների շուրջ: 

BDG-ի բլոգ

BDG-ի բլոգում կարող եք գտնել ինչպես Python-ի, այնպես էլ ծրագրավորման հետ կապված բազմաթիվ այլ թեմաների մասին հոդվածներ հայերենով և անգլերենով։ Բաժանորդագրվեք բլոգի նորություններին և պարբերաբար ստացեք ՏՏ ոլորտի հետ կապված հետաքրքիր հոդվածներ ձեր էլ․ հասցեին։ 

Բացի վերը նշված բազմազան ռեսուրսներից, գրքերը ծառայում են Python-ի յուրացման անգնահատելի մաս: Հատկապես շահավետ նրանց համար, ովքեր նախընտրում են ինքնուրույն ուսուցում, գրքերն առաջարկում են համապարփակ պատկերացումներ Python-ի բարդությունների վերաբերյալ: Սկսնակների համար առաջարկվող գրքերի թվում են Զեդ Շոուի “Learn Python the Hard Way” և Էրիկ Մաթեսի “Python Crash Course” – ը: Այս գրքերը պարունակում են Python հասկացությունների մանրամասն բացատրություններ, որոնք ապահովված են բազմաթիվ վարժություններով և նախագծերով:

Եզրափակիչ մտքեր

Python-ը, անկասկած, այսօր մեծ պահանջարկ ունի և ակնկալվում է, որ ապագայում կմնա այդպիսին՝ շնորհիվ նոր տեխնոլոգիաների իր ուշագրավ հնարավորությունների: Այնուամենայնիվ, մինչ  սկսելը Python-ը սովորելը պետք է հստակ նպատակներ դնել:

Python սովորելիս հաշվի առեք այնպիսի գործոններ, ինչպիսիք են ձեր նպատակները, ընթացիկ հմտությունների մակարդակը, սերտիֆիկացման պահանջները և ձեր կողմից նախատեսված  բյուջեն: Ձեր ընտրած Python դասընթացն ավարտելուց հետո շատ կարևոր է շարունակել կատարելագործել ձեր հմտությունները գործնական  նախագծերում:

Python-ի ուսուցման ուղին խոստանում է բազմաթիվ կարիերայի հնարավորություններ՝ վեբ ծրագրավորումից մինչև տվյալագիտություն և արհեստական բանականություն։ Այնպես որ, եթե որոշել եք ծրագրավորման ոլորտ մտնել, դիտարկեք Python-ը որպես հիմնական տարբերակներից մեկը։ 

Բաժանորդագրվեք՝ մշտապես տեղեկացված լինելու համար

Բաժանորդագրվիր