Ինչպես պատրաստվել հարցազրույցներին ՏՏ ընկերություններում
Ինչպե՞ս պետք է պատրաստվել հարցազրույցից առաջ: Իսկ ի՞նչ են փնտրում տեխնոլոգիական ընկերությունները հարցազրույցի ընթացքում:
Տեխնոլոգիական ընկերությունները հաճախ օգտագործում են բազմաքայլ հարցազրույցներ: Այս ուղեցույցում կներկայացնենք, թե ինչ սպասել հարցազրույցների յուրաքանչյուր փուլում և ինչպես պատրաստվել դրանց։
Հարցազրույցների հիմնական փուլերը ՏՏ ընկերություններում
Առաջին ներածական հարցազրույց
Սովորաբար տեխնոլոգիական ընկերության հետ ծանոթությունը սկսվում է ներածական հարցազրույցից։ Սա հիմնականում կատարվում է հեռախոսով կամ տեսազանգով։ Առաջին հարցազրույցի ժամանակ հարցազրուցավարը ցանկանում է արագ հասկանալ ձեր փորձը և համապատասխանությունը պաշտոնին։
Այս հարցազրույցը սովորաբար տևում է մինչև 15 րոպե (չնայած՝ երբեմն այն կարող է ձգվել մինչև մեկ ժամ): Քանի որ դուք ունեք սահմանափակ ժամանակ, նախօրոք պատրաստեք ամենատարածված հարցերի պատասխանները և ձեր ինքնաներկայացման խոսքը։ Դրա մասին քիչ անց ավելի մանրամասն կխոսենք։
Տեխնիկական հարցազրույց
Տեխնոլոգիական ընկերություններում դուք ամենայն հավանականությամբ կունենաք երկրորդ՝ տեխնիկական հարցազրույց։ Այս փուլում հարցազրուցավարը կլինի ոլորտի մասնագետ, ում նպատակն է պարզել ձեր տեխնիկական որակավորման մակարդակը։
Տեխնիկական հարցազրույցը ամենավախեցնող փուլն է շատերի համար։ Դա մասամբ այն պատճառով է, որ այս հարցազրույցին պատրաստվելը բավականին դժվար է։
Կախված ընկերությունից՝ տեխնիկական հարցազրույցը կարող է լինել հեռախոսազանգ կամ տեսազանգ, տանից հանձնվող թեստ, խնդիրների հավաքածու կամ փոքր պրոյեկտ:
Հիշեք, որ հարցազրուցավարը ոչ միայն ցանկանում է տեսնել խնդրի վերջնական լուծումը, այլև հասկանալ, թե ինչպես եք դուք մոտենում խնդրին, ինչ քայլերով եք այն լուծում։ Այնպես որ խնդրի լուծումը ներկայացնելիս անպայման խոսեք դրա մասին։
Վերջնական հարցազրույց
Սովորաբար վերջնական հարցազրույցն արդեն տեղում է կազմակերպվում, եթե խոսքը հեռակա աշխատանքային հնարավորության մասին չի։ Ամենայն հավանականությամբ այս փուլում ընկերությունն արդեն իր թեկնածուների ցուցակը կրճատել է՝ թողնելով երկու-երեք հոգի։ Եթե հասել եք այս փուլին, ուրեմն հարցազրուցավարները ձեր որակավորման հարցում խնդիր չեն տեսնում։ Նրանք ցանկանում են որոշել, թե ով է լավագույնս համապատասխանում իրենց թիմին։
Որոշ ընկերություններում այս հարցազրույցը կարող է ներառել բազմաթիվ հանդիպումներ ընկերության տարբեր անդամների հետ: Դուք նույնիսկ կարող եք խոսել ապագա գործընկերների հետ և հնարավորություն ստանաք ծանոթանալ ընկերության մշակույթին:
Որոշ ընկերություններում վերջնական հարցազրույցը կարող է լինել բազմօրյա գործընթաց: Մյուս դեպքերում դա կարող է լինել կարճ հանդիպում բարձրաստիճան ղեկավարության հետ՝ աշխատանքի առաջարկը ստորագրելու համար: Ուսումնասիրեք հարցազրույցի գործընթացը կոնկրետ ընկերությունում, որտեղ դուք հարցազրույց կանցնեք՝ նրանց քայլերի մասին ավելին իմանալու համար:
Ինչպես պատրաստվել ձեր առաջիկա տեխնոլոգիական աշխատանքի հարցազրույցին
Եկեք հիմա ուսումնասիրենք մի քանի քայլ, որոնք կօգնեն պատրաստվել հարցազրույցներին և ավելի վստահ ներկայանալ ապագա գործատուին։
1. Ուսումնասիրեք ընկերությունը
Սկսեք պոտենցիալ գործատուին ուսումնասիրելուց: Դուք կարող եք ծանոթանալ տեխնոլոգիական ընկերություններին իրենց կայքերում, LinkedIn-ի միջոցով և նորություններում:
Հիմնական հարցերը, որոնց պատասխանները ցանկալի է գտնել․
- Ընկերության առաքելությունը
- Ընկերության ապրանքներն ու ծառայությունները
- Ընկերության կորպորատիվ մշակույթը
- Աշխատանքի ընդունման կամ հարցազրույցի մասին տեղեկատվություն
- Ընկերության մասին վերջին նորությունները
Նաև կարող եք ուսումնասիրել ընդհանուր ոլորտն ու մրցակիցներին։ Դա ձեզ որոշակի պատկերացում կտա այն մասին, թե որտեղ եք պատրաստվում աշխատել։
2. Ուշադիր ուսումնասիրեք աշխատանքի նկարագրությունը
Նախքան հարցազրույցը՝ վերադառնաք աշխատանքի հրապարակմանը: Անցեք նկարագրության վրայով։ Նշեք աշխատանքի նկարագրության մեջ նշված հիմնական արտահայտությունները կամ հմտությունները և ընտրեք օրինակներ, որոնք ցույց են տալիս ձեր փորձն այդ ոլորտներում:
Օրինակ, եթե հրապարակման մեջ նշվում են ծրագրի կառավարման հմտությունները, հիշեք կոնկրետ դեպքեր, երբ դուք արդյունավետորեն նախագծեր եք ղեկավարել: Դուք կարող եք վերցնել այս կոնկրետ օրինակները և դրանք ինտեգրել հարցազրույցի հարցերի պատասխանների մեջ:
3. Նախօրոք մշակեք «Պատմիր քո մասին» հարցի պատասխանը
Այս հարցը հնչում է գրեթե բոլոր հարցազրույցներում։ Նախօրոք մշակեք և մի քանի անգամ փորձեք այս հարցի պատասխանը, որպեսզի ձեզ վստահ զգաք հարցազրույցի ընթացքում։
Եղեք հակիրճ, բայց հստակ: Տվեք ձեր ներկայիս դերի մեկից երկու նախադասությամբ նկարագրություն, որին հաջորդում է մեկից երկու նախադասություն ձեր մասնագիտության մասին: Ձեր պատասխանը ամփոփեք մեկ կամ երկու նախադասությամբ ձեր ապագա նպատակների և ընկերության նկատմամբ հետաքրքրության մասին: Արդյունավետ պատասխանը կարող է տևել ընդամենը 30 վայրկյան:
Ամեն դեպքում ևս մեկ անգամ ստուգեք ձեր LinkedIn պրոֆիլի տեղեկատվությունը, քանի որ հարցազրույցից առաջ հարցազրուցավարը կարող է ևս մեկ անգամ ստուգել այն՝ ձեր մասին ինֆորմացիան թարմացնելու համար։
4. Մշակեք հաճախ հանդիպող հարցերի պատասխանները
Հարցազրույցների որոշակի հարցեր կրկնվում են տեխնոլոգիական հարցազրույցների մեծ մասում: Դուք, ամենայն հավանականությամբ, կբախվեք ձեր մասնագիտական փորձի, տեխնիկական հմտությունների և կարիերայի նպատակների հետ կապված հարցերին: Նախապես պատրաստեք այս հարցերի պատասխանները:
Պատասխանները մշակելիս ներառեք կոնկրետ օրինակներ ձեր կյանքից և փորձից։
5. Վերհիշեք և պատրաստեք ձեր մասնագիտական ձեռքբերումների օրինակները
Հարցազրուցավարն ունի ձեր ռեզյումեն և ուղեկցող նամակը: Ձեր ռեզյումեի հիմնական կետերը կրկնելու փոխարեն կենտրոնացեք դրանք հիմնավորող օրինակների և ձեր առավելություններն ընդգծող պատմությունների վրա։
Ընտրեք ձեր լավագույն ձեռքբերումներից մի քանիսը և հիշեք ներդրումը կարևոր պրոյեկտներում: Կապեք այս օրինակները աշխատանքի նկարագրության մեջ գտած հիմնական պահանջների մեջ: Նկարագրության յուրաքանչյուր կետի համար նպատակ դրեք առնվազն մեկ օրինակ գտնել:
Այդպիսի օրինակներ գտնելուն կօգնեն հետևյալ հարցերը․
- Ե՞րբ եք աշխատանքում կոնկրետ խնդիր լուծել:
- Ե՞րբ եք ինչ-որ տպավորիչ լուծում գտել:
- Ե՞րբ է ձեր աշխատանքը մեծ ազդեցություն ունեցել ընկերության վրա:
- Ե՞րբ եք ինչ-որ նոր բան փորձել ու հիանալի արդյունքներ ստացել:
- Ե՞րբ եք արդյունավետորեն կարգավորել որևէ կոնֆլիկտային իրավիճակ:
- Ե՞րբ եք ինչ-որ բան արագ սովորել կարճ ժամանակում:
- Ի՞նչ մարտահրավերի եք հանդիպել աշխատավայրում, որը հաղթահարել եք:
6․ Կիրառեք STAR մեթոդը՝ ձեր օրինակները ներկայացնելիս
Այս պատմությունները պատմելիս օգտագործեք STAR մեթոդը: STAR հապավումը բացվում է որպես Situation-Task-Action-Result։
Սկսեք իրավիճակի նկարագրումից (Situation): Հետո ներկայացրեք խնդիրը (Task)։ Այնուհետև պատմեք, թե ինչ եք արել ստեղծված իրավիճակից դուրս գալու համար (Action): Դրանից հետո ամփոփեք արդյունքը (Result)։ Այս մեթոդն օգնում է հասկանալի և արդյունավետ կերպով ներկայացնել ձեր ձեռքբերումները։
7. Նախապատրաստվեք տեխնիկական հարցերին
Տեխնիկական աշխատանքի հարցազրույցներում հաճախ տեխնիկական հարցերը գերակշռում են: Հատուկ հարցերը կախված են դերից և աշխատանքի կոչումից: Բացի այդ, հարցազրուցավարները ցանկանում են իմանալ, թե ինչպես եք վերաբերվում խնդիրներին, որտեղ եք փնտրում տեղեկատվությունը և ինչպես եք աշխատում ուրիշների հետ:
Նախօրոք փորձեք ուսումնասիրել ձեր ոլորտին հատուկ հարցերը և դրանց պատասխանները։ Եվ մի անհանգստացեք, եթե չկարողանաք անմիջապես պատասխանել հարցին: Տեխնիկական հարցերի դեպքում ձեր մոտեցումը և խնդրի լուծումը հաճախ նույնքան կամ ավելի կարևոր նշանակություն ունեն, քան կոնկրետ պատասխանը:
Ի դեպ՝ եթե կարծում եք, որ նոր հաստիքի համար մասնագիտական վերապատրաստման կարիք ունեք, ուսումնասիրեք BDG-ի ծրագրավորման դասընթացները։
8. Պատրաստեք երեք հարց հարցազրուցավարին ուղղելու համար
Նույնիսկ եթե դուք ամբողջովին ուսումնասիրել եք ընկերությունը, հարցեր չտալը կարող է նշանակել, որ հետաքրքրված չեք հաստիքով։
Երբ դուք ուսումնասիրում և պատրաստվում եք, առանձնացրեք առնվազն 3 հարց, որոնք տալու եք հարցազրույցի ժամանակ: Եթե դուք դժվարանում եք հարցեր տալ, հարցրեք ընկերության նպատակների մասին, ինչպիսին է ձեր նոր դերի սովորական օրը կամ հաշվետվությունների կառուցվածքի մասին:
9. Փորձարկեք ձեր աուդիո և վիդեո տեխնիկան, վիդեոյի ֆոնը և հագուստը
Ոչինչ մի թողեք պատահականությանը: Փորձարկեք ձեր աուդիո և վիդեո տեխնիկան վիրտուալ հարցազրույցների համար: Կրկնակի ստուգեք ձեր հագուստը, եթե հարցազրուցավարները կարող են տեսնել ձեզ:
Փորձարկելու համար կարող եք խնդրել ընկերոջը միանալ տեսազանգով և կարծիք հայտնել ձեր տեսանյութի ֆոնի և կապի որակի վերաբերյալ:
10. Ստուգեք ձեր հարցազրույցի ամսաթիվը, ժամը և վայրը և հիշեցում միացրեք
Համոզվեք, որ գիտեք հարցազրույցի ճշգրիտ ամսաթիվը, ժամը և վայրը: Եթե դա վիդեո կամ հեռախոսային հարցազրույց է, ստուգեք ժամային գոտին: Եվ եթե դա տեղում հարցազրույց է, ուսումնասիրեք, թե ինչպես հասնել այդ վայր և որտեղ կայանել:
Ձեզ համար հիշեցում դրեք՝ գրառումները վերանայելու և հարցազրույցից առաջ տրամադրվելու համար:
11. Ընդհանուր տպավորությունը հարցազրույցում
Հարցազրուցավարները չեն կարող հիշել հարցազրույցի ժամանակ ձեր ասած յուրաքանչյուր բառը: Բայց նրանք հիշում են, թե ինչ տպավորություն են ստացել ձեզ հետ շփվելիս: Առաջին տպավորությունը կարևոր է։ Դուք պետք է ընկերասեր և պրոֆեսիոնալ տպավորություն թողնեք։
Հարցազրուցավարը միշտ զուգահեռ ցանկանում է հասկանալ, թե ինչպիսի թիմակից կլինեք իրենց ընկերությունում։ Փորձեք ողջ ընթացքում ներգրավված մնալ, փոխանցել դրական էներգիա և էնտուզիազմ։
Փորձեք պատասխանել հարցերին հնարավորինս կոնկրետ և խուսափեք երկիմաստություններից: Հարցազրույցի վերջում շնորհակալություն հայտնեք հարցազրուցավարին հատկացված ժամանակի համար և արտահայտեք ձեր հետաքրքրությունը դերի նկատմամբ:
12. Սովորեք հարցազրույց անցնել ընկերոջ հետ, ով ձեզ կառուցողական հետադարձ կապ կտա
Կառուցողական հետադարձ կապը կարող է ամեն ինչ փոխել հարցազրույցի պատրաստվելիս: Պրակտիկ հարցազրույցի փորձը լավագույն վարժությունն է, որ կարող եք անել։
Խնդրեք ընկերոջը կամ ընտանիքի անդամին հարցազրույցի իմիտացիա անցկացնել և հետադարձ կապ տալ ձեր պատասխանների վերաբերյալ: Տրամադրեք ընդհանուր հարցերի ցանկը և նույնիսկ փորձեք ձեր հարցերը հարցազրուցավարի համար: Դրական արձագանքները կամ ձեր պատասխանները վերամշակելու հնարավորությունը կբարձրացնեն ձեր վստահությունը հարցազրույցի ժամանակ:
Այսպիսով՝ ձեր հաջորդ հարցազրույցը կարող է հանգեցնել աշխատանքի առաջարկի։ Բայց հնարավոր է, որ դուք լավագույն թեկնածուն չլինեք այս անգամ։ Անկախ ամեն ինչից՝ բարելավեք հարցազրույցներ անցնելու ձեր հմտությունները և դրականորեն տրամադրվեք հաջորդ հարցազրույցից առաջ։ Այս հմտությունները ձեզ դեռ պետք կգան կարիերայի ընթացքում։ Իսկ եթե որոշել եք կարիերայում փոփոխությունների գնալ, դիտարկեք նոր մասնագիտության ուսումնասիրումը BDG-ում։ Մենք ունենք ամենատարբեր մասնագիտություններով 70-ից ավել դասընթացներ։
